AAWINS

Gefilleseteerd mit dit nuiste produk!
Dier hat ’t modernste apperaat gegolle dat mit de groeëtste
zörg is samegesjteld en mit de betste materiale.
Durchlopende produktiekontroles en de sjtrengste teste,
make dit tot ee kwaliteitsproduk. Prefiesiat,
vier wunsje Uch joarelank vöal plezeer d’r mit!
Kaat achter in de oetvouwklep binne twieë weëke invulle
en isjikke vuur de garantie.

Zoeë begin ich te leëze óp ‘t blauw plekpleëtje óp
de doeës van de koffemesjieng. Wie ich de doeës oape
gefriekeld houw sjteet mit groeëte lettere óp d’r binnedeksel:
”lees eerst even de handleiding aandachtig alvorens het toestel
in gebruik te nemen”
”Even” of ich mar effe ing in d’r plestiek igepakde handleiding
van 168 bladzieje wool leëze ?
Wat ee bookwerk, ich gleuf die hant ee sjrüfke los !

”Sjtel dich neet aa” zeët mieng vrouw wie ze mie lank gezich
zoog, dat is neet allenui Hollendsj. Kiek oet dieng duppe da
has te ’t zoeë gezieë.
”En sjeet ee bietje óp die van d’r Boeën kómme óp tied”.
Inderdaad, oetgereëkend vuur dön hant v’r hüj dees koffemesjieng
aagesjaf want die kómme dizze oavend óp bezeuk. Egelig wole v’r
dit neet, mè oet good fatsoen mótte v’r. Zie hant ós lets
oetgenuëdigd en da kans te neet angesj as hön truukvroage.
Lever neet dat sjtuut-miensj uëver höare koffe. Zie wis doa alles
va en óch genau wies te ’m mós zette, wie heet ’t water, welk
merk, wie lang van te vure en en en…..
Heë, d’r Frens is ’ne patente keël, mè zie….. Döar zalle v’r ins
koffe loate preuve. Dat hat die nog noeëts a gen naas gehad !

Vier hant ‘t ós get loate koste dis kier en da oet ’t land woeë
ze d’r get va wete: Italië !
”Went die Italiane urges alles va wete da is ’t ies en koffe”
zeët de vrouw ónger ‘t óprume va ’ne haove kielemeter
doeëze-plekband. ”En va sjpagetti” reup de dochter dat
zich deë hantier vanoet de kamer houw aagezieë.
”Rujig” keëkt de mam wer truuk, ”d’r pap is de handleiding ’nt
besjtudere”. Inderdaad zit ich geboage uëver de instructions.
Doa weëd verwieze noa d’r insjtallatiefolder, inne greune sjteet
d’r bei.

Mit z’n twieë noa de achterkuëke en in tied va nieks sjtónt v’r
allebei ’t ungesjte boave mit d’r kop in de groeëte doeës, zeuke
tusje plekband, sjoemplestiek en angere verpakkingskroam.
En joa doa is ’e. ’t Woar ’ne geële, d’r greune. Die hant ech
ing sjroef los, d’r greune is inne geële ! Egaal, v’r houwe ’m.
Instellatione. Óch al wer zoene knoepert in 16 tale...
zieëker good vuur ’t miljeu zoeëvöal papier…..

Wat ’e geluk, doa sjeet ’t: begin nurges aa vuurdat ’t
besjermkepke d’r vanaaf is gehold. Dit dient te geschieden met
een scherp voorwerp. Get sjerps…De vrouw kiekt mich aa…
Ich kiek höar aa.. Zie mint ee kuëkemetske woar good um achter
het aluminiumniepelke neëve ’t zjwat/wit sjuufsjakeleerke te
sjuve en tegeliekertied teëge de klok in te drieëne umhoeëg
te wippe en mit d’r doem d’r ovale sensor in te sjakele woedurch
neet alling ’t besjermkepke d’r vanaaf geet, mè óch de drei
sjtelsjroeve zichbaar weëde woemit me de isjtellinge kan keze
die de semi- en volautomtiesje keuzes van de pause- en
selectiefunkties kan bedene. Brrrrr ich krieg inne puntkóp
d’r va. Eëve sjlaagveëdig wie sadisties reupt de dochter:
”Pap mót ich dich ing puntmutsj make” ? Zouws te d’r kruppel
neet…. In plaatsj van de koffemesjieng inee, zouws te de dochter
’t leefste oetee numme !

Enfin, ich sjtudeer wier en bin al bei hoofsjtuk 4 punt zieëvetieën.
Nog effe en da geet ’t gebure:kin d’r “Crema Grandioso” aa. Koffe,
espresso, capucino, sjterk, extra sjterk, ing tas, 2,3 of ing
ganse kan, alles kan mit ’t apperaat. De vrouw hat d’r koffe al as
proof gereed ligke. V’r dónt mar ing extra boeën dróp vuur die van
d’r Boeën….
Noa nog semplige igrieëpe sjloan ich de bladzie um en….nieks…
doa begint ‘t Italiaans !
Zouws te neet oeteree sjpringe.. wat noe ? Inserta una Selectione..
el modo inversión…en zoe wier…

”Han ich dich dierek gezag” reupt de vrouw, ”loat mich dat doeë.
Doe wits va zoeëget wits te nieks”
Miene sjtols wilt zich nog verzette, mè ’t gieëf nieks, ich krieg
mieng keulkas-ervaring ónger de naas gevrieëve die ieësj heet in
plaatsj va kaod woeëd en wie ich doe wier draa gekloemeld houw,
woar ing sjtónd later de duur vasgevroare….
”Gank weg duppesjurger ich zal dat óch wal wer zelf doeë” keëkt ze…
Inderdaad va zoeëget hat ze versjteestemich en wit alles va
wesjdruëger bis magnetrón, va tilleviesie-isjtelling tot hoardruëger,
mè óch zie koam neet droet. Ich vóng dat good, woar ich neet langer
’t höar van de famielie…
De dochter die ’ne blauwe moandig mit inne Italiaan gesjarreld houw,
wis ‘t och neet. Doa sjtónge v’r da mit troeve oas. ”Gefeliciteerd,
U hebt een kwaliteisprodukt aangeschaft” reupt ’t sjinoas nog.
Da has te vöal betald, sjèlerei en krach in de boet, de nerve
kapot en d’r kloemel deet nieks….

Gebeld mit d’r servicedeens van de firma…. Hebt U vragen over ’n
strijkijzer toets een 1, Sjtriekiezer ?
Ich sjtriek dön dalig ing ! over magnetrons een 2, koelkasten een 3,
broodroosters een 4, koffiemachines ’n 5. Ha doa zint v’r d’r…
Hebt U een Crema Normale toets een 1, een Crema Normale AX een 2, een
Crema Grandioso een 3. Hè hè, endlig.
Piep piep al onze medewerkers zijn in gesprek. Door de drukte adviseren
wij U het op een later tijdstip nog eens te proberen…Lek mich…
te breer Later tijdstip.. die van d’r Boeën kómme geliek al !

Va ieëlend ”de met uiterste zorg ontworpen koffiemachine” wied
voetgezat en mar geweune koffe gemak, woebei ich nog de wach kreeg
aagezag um vuural nieks, mè da óch nieks te loate merke. Zie, die
van d’r Boeën zouws te gee groeëter plezeer kinne doeë en zouw die
lang moel wal d’r ganse oavend uëver koffe loate goa. Wie ze koame en
de vrouw extra sjterk gemakde koffe wool presentere, houw de madam toch
lever tieë; an de ing zie vuur te vrekke, van de anger zie ee geluk.

Ich woar gelane wie ich ’s-moandigs noa d’r winkel góng..
”Kal mar van dich aaf, loat dich mar neet vuur gek versjliete” bóng de
vrouw mich nog óp ’t hat vuur ich de duur oet góng…Doa aagekoame koam
ich pas richtig óp d’r koffe…

”Dan zal d’r wal wer get verkieëds ha gedoa” zeët d’r man in d’r
winkel grienlecherig.
Dit noe houw heë neet mótte zage, dit góng te wied, dit woar te vreg,
dit woar d’r drüpel, dit woar juus te vöal.
”Dier zalt wal wer” Dat wöadje ”wer” dóng de duur touw. Dat hoof ich
mich toch neet te loate gevalle”!!

Enfin…’t geet noe wer get beëter mit ’m….Heë is oet ’t ziekehoes…
Heë lupt wer…óp krukke…vuur haof daag….

D’r ”Crema Grandioso” deet ’t endlig, d’r woar ee sjrüfke los…..